មន្រ្តីនគរបាលនៃអធិការដ្ឋានក្រុងកំពតម្នាក់ ត្រូវបានឃាត់ខ្លួន បន្ទាប់ពីគប់កែវស្រាលើនារីបម្រើសេវាចាប់ទឹកកកម្នាក់ ក្នុងកម្មវិធីមួយ កាលពីយប់ថ្ងៃទី១៩ មេសា។ ជុំវិញករណីនេះ លោក ម៉ៅ ច័ន្ទមធុរិទ្ធ ស្នងការខេត្តកំពត បញ្ជាឱ្យអធិការក្រុងកំពតនាំខ្លួនមកអនុវត្តតាមផ្លូវច្បាប់ដោយគ្មានការលើកលែង។
ក្រោយអ្នកប្រើប្រាស់បណ្ដាញសង្គមចែករំលែកករណីបុរសម្នាក់ ជាមន្រ្តីនគរបាលនៃអធិការដ្ឋានក្រុងកំពតម្នាក់ បានប្រើប្រាស់អំពើហិង្សា ដោយគប់កែវស្រាលើនារីជាអ្នកចាប់ទឹកកកក្នុងកម្មវិធីមួយ បណ្ដាលឱ្យបែកក្បាល និងរបួសក្រោមភ្នែក លោក ម៉ៅ ច័ន្ទមធុរិទ្ធ ស្នងការខេត្តកំពត បានបញ្ជាឱ្យនាំខ្លួនមកទទួលទោស។
លោកស្នងការខេត្តកំពត បានប្រាប់សារព័ត៌មានឌីជីថលថ្មីៗថា បុរសជាមន្រ្តីនគរបាលខាងលើ នឹងទទួលរងនូវចំណាត់ការតាមផ្លូវច្បាប់ ដោយមិនលើកលែង។ លើសពីនេះ លោកស្នងការខេត្តកំពត នឹងប្រជុំក្រុមប្រឹក្សាវិន័យ ថាតើត្រូវបណ្ដេញចេញពីក្របខណ្ឌឬយ៉ាងណា។
បើតាមលោក ម៉ៅ ច័ន្ទមធុរិទ្ធ ករណីខាងលើជនរងគ្រោះមិនបានមកដាក់បណ្តឹងនោះទេ ដែលធ្វើឱ្យមានការយឺតយ៉ាវក្នុងការទទួលព័ត៌មាន។ ទោះជនរងគ្រោះមិនប្ដឹងក្ដី តែលោកស្នងការខេត្តកំពត មិននៅស្ងាត់នោះឡើយ រហូតវាយខ្នោះ និងនាំខ្លួនជនបង្កឈ្មោះ ទេព សុខផេង មកកាន់អធិការដ្ឋាននគរបាលក្រុងកំពត។
«មន្ត្រីជាអ្នកអនុវត្តច្បាប់ និងជាអ្នកបំរើប្រជាពលរដ្ឋដ៏ល្អ តែបើមន្ត្រីធុននេះ គឺមិនមាននៅក្នុងវចនានុក្រមរបស់ខ្ញុំនោះទេ ។ មន្ត្រីដែលផឹកស៊ីហើយបានយកកែវគប់មកលើប្រជាពលរដ្ឋ និងត្រូវអនុវត្តទោសដោយគ្មានការលើកលែងជាដាច់ខាត»។ លោកស្នងការខេត្តកំពត សរសេរលើទំព័រហ្វេសប៊ុកដូច្នេះ។
សូមបញ្ជាក់ថា កាលពីយប់ថ្ងៃទី១៩ មេសា មានករណីគប់កែវស្រាលើនារីចាប់ទឹកកកម្នាក់ ក្នុងកម្មវិធីមួយ នាភូមិអណ្ដូងខ្មែរ សង្កាត់អណ្ដូងខ្មែរ ក្រុងកំពត ខេត្តកំពត៕
