ចេញផ្សាយ ថ្ងៃទី ២៣ ខែ មករា ឆ្នាំ ២០២៦
សម្ដេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បានសម្ដែងនូវការអបអរសាទរចំពោះ ឯកឧត្តម តូ ឡឹម ត្រូវបានមហាសន្និបាតតំណាង ទូទាំងប្រទេសលើកទី ១៤ របស់គណបក្សកុម្មុយនីស្តវៀតណាម ជ្រើសតាំងសាជាថ្មីជាអគ្គលេខាធិការ នៃគណៈកម្មាធិការ មជ្ឈិម គណបក្សកុម្មុយនីស្តវៀតណាម។ ក្នុងលិខិតផ្ញើជូនឯកឧត្តម តូ ឡឹម អគ្គលេខាធិការនៃគណៈកម្មាធិការមជ្ឈិម គណបក្សកុម្មុយនីស្តវៀតណាម ចេញផ្សាយថ្ងៃទី២៣ ខែមករា ឆ្នាំ២០២៦ សម្ដេចតេជោបានគូសបញ្ជាក់ថា តាងនាមឱ្យគណៈកម្មាធិការកណ្តាល គណបក្សប្រជាជនកម្ពុជា និងរូបខ្ញុំផ្ទាល់ ខ្ញុំសូមចូលរួមអបអរសាទរប្រកបដោយមនោសញ្ចេតនាយ៉ាងកក់ក្តៅជាទីបំផុត ជូនចំពោះ ឯកឧត្តម ក្នុងឱកាសដ៏ឧឡារិកនេះ។ ការបោះឆ្នោតជ្រើសតាំង ឯកឧត្តម សាជាថ្មីជាអគ្គលេខាធិការ នៃគណៈកម្មាធិការមជ្ឈិម គណបក្សកុម្មុយនីស្ត វៀតណាម គឺជាការឆ្លុះបញ្ចាំងនូវទំនុកចិត្ត និងការជឿជាក់របស់គណបក្សកុម្មុយនីស្តវៀតណាម និងប្រជាជនវៀតណាម ចំពោះការដឹកនាំដ៏ឈ្លាសវៃ និងប្រកបដោយសមត្ថភាពរបស់ ឯកឧត្តម ក្នុងការតម្រង់ទិសដើម្បីអភិវឌ្ឍប្រទេស ដែលធានាឱ្យប្រជាជនទទួលបាននូវសន្តិភាពយូរអង្វែង ស្ថិរភាព និងវិបុលភាពដែលរីកចម្រើនជាលំដាប់ ក៏ដូចជាលើក កម្ពស់កិត្យានុភាព និងតួនាទីរបស់ វៀតណាមនៅក្នុងតំបន់ និងអន្តរជាតិ។ខ្ញុំមានជំនឿជឿជាក់យ៉ាងមុតមាំថាក្រោមការដឹកនាំប្រកបដោយចក្ខុវិស័យវែងឆ្ងាយ និងសម្លឹងទៅអនាគតរបស់ ឯកឧត្តម គណបក្សកុម្មុយនីស្តវៀតណាម នឹងទទួលបានទំនុកចិត្ត និងការគាំទ្រកាន់តែខ្លាំងឡើងពីប្រជាជនវៀតណាម និងសម្រេចបានជោគជ័យយ៉ាងធំធេងក្នុងការអនុវត្តគោលនយោបាយ និងការសម្រេចចិត្តនានាដែលបានអនុម័តដោយ មហាសន្និបាតតំណាងទូទាំងប្រទេសលើកទី១៤។ សម្ដេចតេជោបញ្ជាក់បន្ថែមថា ជាមួយនឹងកិច្ចខំប្រឹងប្រែងរបស់យើងទាំងពីរ ខ្ញុំមានជំនឿជាក់យ៉ាងមុតមាំថា ចំណងមិត្តភាព នៃប្រទេសយើង ទាំងពីរត្រូវបានពង្រឹងឱ្យកាន់ស៊ីជម្រៅបន្ថែមទៀត ស្របតាមទិសស្លោក “ភាពជាអ្នកជិតខាងល្អ មិត្តភាព ជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែង រវាងគណបក្ស និងរដ្ឋាភិបាល នៃប្រទេសយើងទាំងពីរ៕ ដោយ៖ AKP
